CTU*

Pinag-iipunan.

Nagpapapatak.

Makakumpleto lang ng bente sinco.

kapalit ang bawat letrang

manggagaling sa ‘yo.

Inaabangan na makita ang pangalan

sa new messages,

habang binabaybay naman sa inbox

ang mga mensaheng

magpapangiti sa malungkot na umaga

at magpapatatag sa pangungulila tuwing gabi.

Hindi sapat ang message counter at call duration

para itala ang tagal ng pagkakakilalanlan;

Hindi rin batayan ang call log

kung hindi nag-kakausap.

Ang mahalaga ay kung paano

pagpapahalagaan ang signal:

Madalas putul-putol ang linya,

hindi magkaintindihan sa mga nais ipahayag;

May panahon namang walang marinig,

sinisikap na maunawaan ang esensiya ng walang imikan;

Malimit ding mahirap kumunek,

kailangan ng mahabang pasensiya

para ituro kung paano ang mag-hintay

gayun din naman kung walang signal.

*Para sa mahal kong kasama, kaibigan at karelasyon